iSON Xperiences O‘zbekistonni mijozlarga xizmat ko‘rsatish bo‘yicha ofshor markazini ochish uchun potentsial maydon sifatida ko‘rib chiqmoqda

Global Business Services Forum 2026 (GBSF 2026) doirasida O‘zbekiston Respublikasi Raqamli texnologiyalar vaziri Sherzod Shermatov iSON Xperiences kompaniyasining bosh operatsion direktori Rami Sveys bilan uchrashuv o‘tkazdi.

Tomonlar iSON Xperiences’ning O‘zbekistondagi ilk loyihasini ishga tushirish rejalarini hamda autsorsing va Global Business Services (GBS) sohasida uzoq muddatli hamkorlik istiqbollarini muhokama qildilar.

2011-yilda asos solingan iSON Xperiences Mijozlar tajribasi (Customer Experience, CX) va Biznes jarayonlari autsorsingi (Business Process Outsourcing, BPO) sohasidagi dunyoning yirik kompaniyalari qatoriga kiradi. Bugungi kunda kompaniya 19 mamlakatda 18 000 dan ortiq xodimni birlashtirgan, 40 dan ziyod operatsion maydonchalarni boshqaradi va har oy 50 milliondan ortiq mijozlar murojaatiga ishlov berib, butun dunyodagi xalqaro brendlarga xizmat ko‘rsatadi.

Muzokaralarning asosiy mavzusi iSON Xperiences’ning O‘zbekistonda birinchi loyihasini ishga tushirish rejalari bo‘ldi. Kompaniya mamlakatni xalqaro mijozlarga xizmat ko‘rsatish va eksportga yo‘naltirilgan BPO xizmatlarini rivojlantirish uchun yangi ofshor maydon sifatida ko‘rmoqda.

Tomonlar rusiyzabon mutaxassislar uchun 100 ta ish o‘rniga ega mijozlarni qo‘llab-quvvatlash markazini tashkil etishni ko‘zda tutuvchi birinchi loyihaning yo‘lga qo‘yilishini muhokama qildilar. Kelajakda kompaniya ingliz, nemis, turk va boshqa tillarda mijozlarga xizmat ko‘rsatish uchun jamoalarni kengaytirishni hamda O‘zbekistondagi faoliyati ko‘lamini bosqichma-bosqich oshirishni rejalashtirmoqda.

O‘z navbatida, IT Park Uzbekistan xalqaro BPO-kompaniyalar uchun mavjud bo‘lgan qo‘llab-quvvatlash choralarini, jumladan, soliq imtiyozlari, mutaxassislarni tanlash va tayyorlashda ko‘maklashish, shuningdek, loyihani amalga oshirishning barcha bosqichlarida hamrohlik qilish kabi imkoniyatlarni taqdim etdi. Shuningdek, tomonlar loyihani ishga tushirish bo‘yicha keyingi qadamlar va uzoq muddatli hamkorlikni rivojlantirish istiqbollarini muhokama qildilar.

iSON Xperiences loyihasining amalga oshirilishi xalqaro BPO-kompaniyalarning O‘zbekistonga bo‘lgan qiziqishi ortib borayotganining yana bir yorqin misoli bo‘ladi. IT Park Uzbekistan uchun bu yangi investitsiyalarni jalb etish, malakali ish o‘rinlarini yaratish va mamlakatning eksport salohiyatini yanada rivojlantirish demakdir.

Yaratilgan vaqt: 27.07.2026

Ko‘rishlar soni: 3